السلام عليكم
مساكم الله بالخير
شخباركم عساكم طيبين من الله قريبين
كنت جالس مع الشباب امس بالليل وذكرني واحد بقصة سلك التلفون اللي صارت لي زمااان قبل لا اسمع بشي يقولوله دي اس ال
تقول القصة ..
قبل تقريبا 4 او5 سنين كان عندي جهاز وكان عندي موقع اسمه المشفر لو احد مر عليه هالاسم << ما اضن والله مر على احد كل اللي كانوا فيه اخوياي
كان المفروض اسميه منتدى واكتب اسم حارتنا واحط الاقسام بيوت حارتنا بيت بن حشاش وبيت بن شليويح وبن كمور وبن خراب << عاشت الاسامي
ماعلينا بس على ذيك الايام كنت متحمس للنت وللموقع عشانه جديد وتوي فاتحه وكاشخ به ومستانس الابتسامه مثل الابتسامه اللي يجيبونها بإعلان المراعي بالتلفزيون
وكنت اشتغل عالنت كثير وجات فاتورة جامده جاني الوالد (الله يطول بعمره) وانواع التهزيء والتصفيق والتكفيخ وصار يسحب سلك التلفون مني صرت ماعاد اقدر ادخل بدون سلك التلفون
سحب الوالد سلك التلفون وتوهقت انا بدون نت واروح احوس وادوس بالبيت ولا القا سلك تلفون وتصك براسي اني اروح لجيراننا ريان (الله يذكره بالخير) واشد حزامي وادق عليهم واقول واجلس اترجى فيه تكفى وما تكفى ابغا السك << ادمان والله لحد يلومني
المهم ويجلس يصرف فيا اهلي يبون يكلمون بالتلفون ما اقدر اعطيك وانا اللي انشب له واجلس احشره بالكلام اقله ياخي معقولة بالبيت مافي الا سلك واحد الين ما وافق وانا اللي اخذ السلك منه وجري عالبيت واشبك وادخل النت ما مرت عشر دقايق الا والوالد صاحي بيروح يصلي العصر بالمسجد ما يمديني افصل السلك واطفي الجهاز الا وهو ماسكني مع الفنيله وانواع التهزئ والتكفيخ
ويسحب السلك عاد الوالد طلع من اول ما اذن يعني راح المسجد وهو توه مأذن يعني في وقت اقدر ادخل قبل لا يجي لكن من وين اطلع سلك واشغل النت لان السلك حق ريان سحبه الوالد واعصر مخي وجري على جيراننا الثانيين عبدالرحمن وانا اللي ادق الباب ويطلع لي عبدالرحمن وانا اللي اجلس اطلبه السلك ويصرفني وانشب له الين ما طلع لي سلك التلفون واروح واشغل النت واجلس اتصفح ما ادري الا واللي ماسكني مع فنيلتي الكرواتيه << فنيلة زمان
وانواع التكفيخ وتهزيء ودنيا ورجه وكيف وحرمني من الشارع ذاك اليوم كان يوم اسود عاد الا الشارع عندي انا واجلس اذاكر قدام الوالد عسا يحن ويخليني اطلع جات الساعه 5 ودق الباب كلمني اخوي قالي عبدالرحمن وريان يبونك برا واجي ابغا اروح لهم ولا الوالد طلع لهم قالهم وش تبون بـ فاااارس د قال عبدالرحمن ابغا سلك التلفون حقنا وقال ريان حتى انا ابغا سلكنا والله يرجع الوالد لي وانواع التكفيخ اذكر انه رفسني رفسه بحنيه من قوة حنان الرفسه اذكر اني شفت غراب جاي طاير عليا هذي قصتي مع سلك التلفون << ماشفنا من هالسلك الا التكفيخ والتشويت
وان شاء الله اعبتكم قصتي
واحلى ورده حمراء لاحلى الاعضاء
الثلاثاء مايو 01, 2007 2:35 pm